Í tilefni dagsins - 24.10.2024

Já, íslenskar konur brugðust eftirminnilega við kalli Sameinuðu þjóðanna 24. október 1975, viðburður sem enn vekur athygli og aðdáun, m.a. fyrir tilstilli baráttukvenna í hópi listamanna. Í tilefni dagsins, og til að hita upp fyrir baráttu afmælisársins, er blásið til sameiginlegs viðburðar í kvöld í Bíó Paradís. Þar verður frumsýnd heimildamynd Hrafnhildar Gunnarsdóttur og Pamelu Hogan Dagurinn sem Ísland stöðvaðist um kvennafrídaginn á Íslandi fyrir 49 árum, þegar 90% kvenna lögðu niður störf til að sýna fram á mikilvægi framlags kvenna til atvinnulífs og umönnunar af öllu tagi. Myndin hefur þegar vakið athygli víða um heim, en er nú frumsýnd hér á landi í endanlegri gerð. Það á vel við að slíkur viðburður sé haldinn á kvennafrídeginum sjálfum og marki um leið upphaf 50 ára afmælisársins. Baráttan framundan er jafn mikilvæg og oft áður. Í því sambandi er viðeigandi að vitna til orða Vilborgar Harðardóttur, blaðamanns og rauðsokku, þegar hún hélt ávarp á 25 ára afmæli kvennadagsins og sagði:

Það er erfitt að skyggnast til framtíðar og ég vil ekki trúa öðru en að jafnrétti og jöfn staða kynjanna náist að lokum. En ef ekki á að verða bakslag [ ... ] verður að standa á verðinum, alltaf!