Björg Kjartansdóttir er nýr framkvæmdastjóri BHM

„Við erum mjög ánægð að fá Björgu til liðs við okkur. Björg býr yfir fjölbreyttri reynslu af almennum og opinberum vinnumarkaði, sem stjórnandi, í almannatengslum og sérfræðingur í fjármálum stofnana og fyrirtækja. Hún hefur leitt breytingastjórnun, stýrt teymum með fjölbreyttan bakgrunn og býr að reynslu í samskiptum við margvíslega hagaðila,“ segir Kolbrún Halldórsdóttir formaður BHM.

Björg kemur til BHM frá Alþjóða Rauða krossinum í Genf, þar sem hún stjórnaði fjölþjóðlegu teymi í upplýsingadeild samtakanna. Hún var áður sviðsstjóri hjá Rauða krossinum á Íslandi þar sem hún fór meðal annars fyrir tekjuöflun og kynningarmálum.

Björg var verkefnastjóri í fjárfestingateymi KPMG, gengdi starfi fjárfestingastjóra hjá Arev verðbréfafyrirtæki og var viðskiptastjóri við MP banka. Hún var einnig fyrsti framkvæmdastjóri DeaMedica og stjórnaði uppbyggingu fyrirtækisins, sem rekur hátækni skurð- og læknastofur. Þá starfaði hún sem sérfræðingur í félags- og vinnumarkaðsráðuneytinu og var verkefnastjóri í frammistöðumati hjá ríkisendurskoðanda.

Björg er menntuð í sálfræði, sem félagsráðgjafi frá Háskóla Íslands, hefur lokið stjórnendamarkþjálfun og MBA gráðu frá Háskólanum í Reykjavík, auk meistaragráðu í aðferðafræði frá Maastricht University.

Björg er gift Benedikt Stefánssyni forstöðumanni fjárfesta- og almannatengsla hjá Alvotech og eiga þau þrjá syni.