Að mati BHM þarf að forgangsraða aðgerðum til að koma á stöðugleika í ríkisfjármálum en um leið að vernda árangur kjarasamninga og tryggja stöðu efnahagsmála, þannig að ekki komi til uppsagna sökum forsendubrests. Jafnframt bendir bandalagið á að vaxtagjöld skv. frumvarpinu séu vanáætluð líkt og raunin virðist ætla að verða 2024 þar sem útlit er fyrir að þau aukist um 11% frá samþykktum fjárlögum 2024.
Í umsögninni er lagt til að gripið verði til ýmissa aðgerða til að ná fyrr jafnvægi í ríkisfjármálum, s.s. að hækka bankaskatt, hækka tryggingargjald, lækka frítekjumark fjármagnstekna og skattleggja söluhagnað íbúðarhúsnæðis. BHM bendir á að óeðlilegur hvati sé í skattkerfinu þar sem hagnaður af íbúðarsölu er skattfrjáls.
Hin þráláta verðbólga og háir vextir eru mjög íþyngjandi fyrir heimilin í landinu. Vaxtabyrði yngra fólks hefur aukist hratt m.a. með þeim afleiðingum að ungt fólk leitar í auknum mæli aðstoðar annars staðar en hjá hinu opinbera við fyrstu húsnæðiskaup. Vísbendingar eru um að leitað sé til foreldra eða skyldmenna en fyrirframgreiddur arfur hefur aukist um 20% frá 2021 og enn er gert ráð fyrir aukningu.
Skattbyrði millitekjufólks er há og er hlutfall launa sem varið er í skatta og lífeyrisgreiðslur hærra á Íslandi en í samanburðarlöndum og telur BHM ótækt að hækka hana enn frekar. Til viðbótar við skattbyrði er þessi hópur með greiðslubyrði námslána sem Lífskjararannsókn BHM sýnir að leggst þungt á háskólamenntaðra á vinnumarkaði. Þá hefur kaupmáttur meðaltals ráðstöfunartekna hjá fólki með meistaragráðu lækkað um 6% á tuttugu ára tímabili, 2002-2022 á meðan kaupmáttur fólks með grunnskólamenntun hefur aukist um 29% á sama tíma. Ástæðuna má m.a. rekja til áhersla um krónutöluhækkanir í kjarasamningum.
