Kjarasamningur er samningur um kaup og kjör fólks. Kjarasamningar eru ótalmargir og forsendurnar fjölbreyttar. Stéttarfélög sjá um að gera samninga fyrir sitt félagsfólk og tryggja þannig launakjör þeirra. Stéttarfélögin gera samninga við atvinnurekendur eða samtök á þeirra vegum, til dæmis Samtök atvinnulífsins eða ríki og sveitarfélög.
Kjarasamningar eru lágmarkssamningar sem þýðir að ekki er hægt að greiða laun eða bjóða kjör undir því sem samið er um. Allir samningar um lakari kjör en það sem fram kemur í kjarasamningi eru ólöglegir. Þannig má ávallt semja um kjör og réttindi umfram það sem er tryggt með kjarasamningum eða lögum en aldrei verri.
