Bandalag háskólamanna og Landssamtök íslenskra stúdenta hafa endurnýjað samstarfssamning sín á milli. Einn af nýju áhersluþáttunum í samstarfinu er að standa sameiginlega að lífskjararannsókn meðal stúdenta. Áætlað er að könnunin verði send út á allra næstu dögum.
Kolbrún Halldórsdóttir formaður BHM, Alexandra Ýr van Erven forseti LÍS og Gissur Kolbeinsson framkvæmdastjóri BHM
BHM og LÍS hafa átt í góðu og farsælu samstarfi á undanförnum árum og er nýi samningurinn fyrst og fremst til að skerpa á sameiginlegum áherslumálum og bæta við nýjum sem ástæða þykir að vinna að. Bandalaginu þykir mikilvægt að vera í góðum tengslum við stúdenta. Þeirra er framtíðin á vinnumarkaði og í kjarabaráttunni.
Til að styrkja tengsl samtaka stúdenta og aðildarfélaga BHM munu fulltrúar LÍS hafa aðkomu að fundum formannaráðs BHM a.m.k. tvisvar á ári. Þá á LÍS rétt á þátttöku í stefnumótun BHM og bandalagið mun leita til samtakanna um málefni sem BHM hyggst álykta um og varðar námsmenn. BHM leggur LÍS til skrifstofuhúsnæði og rekstrarstyrk.
Samningurinn verður endurskoðaður í apríl 2025 en hvor aðili um sig getur óskað eftir endurskoðun á gildistímanum.
BHM og LÍS eru nú með markaðsátak í gangi þar sem háskólastúdentum er óskað til hamingju með háskólagráðuna og þeir minntir á mikilvægi góðs stéttarfélags. Öll eru velkomin í BHM.
