Leikarar og dansarar boða verkföll í Borgarleikhúsinu
13. mars 2025
Lítið hefur miðað í samningaviðræðum Félags íslenskra listamanna í sviðslistum og kvikmyndum (FÍL) og Leikfélags Reykjavíkur ses. sem annast rekstur Borgarleikhússins. Viðræður um nýjan kjarasamning fyrir dansara og leikara hafa staðið yfir síðan í september 2024 án árangurs. Í lok nóvember sl. var deilunni vísað til ríkissáttasemjara án þess að það skilaði neinum árangri.
Nú nýlega lýsti samninganefnd FÍL viðræðurnar árangurslausar og hélt í kjölfarið deildarfund þar sem ákveðið var að fram færi atkvæðagreiðsla um vinnustöðvanir leikara og dansara í Borgarleikhúsinu á tilteknum dögum.
Niðurstaða atkvæðagreiðslu var sú að verkföll voru samþykkt með 90% greiddra atkvæða og fara fram á eftirfarandi dögum frá kl. 18:30 til 23:00:
· Fimmtud. 20. mars
· Föstud. 21. mars
· Laugard. 22. mars
· Sunnud. 23. mars
· Fimmtud. 27. mars
· Laugard. 29. mars
· Sunnud. 30. mars
BHM lýsir yfir stuðningi við kjarabaráttu FÍL og hvetur Leikfélag Reykjavíkur ses. til að mæta félaginu í viðræðunum og reyna að leysa úr deilunni áður en til verkfalla kemur.
