Samtöl BHM við forystufólk stjórnmálaflokka í aðdraganda kosninga

Í aðdraganda samtalsins höfðu sérfræðingar BHM rýnt stefnumál stjórnmálaflokkanna og mótað spurningar er varða áherslumál sem brenna á félagsfólki. Spurningarnar voru sendar flokkunum og eru svörin við þeim óðum að berast. Samtölin, sem fara fram á klukkutímalöngum fundum með hverju framboði fyrir sig, grundvallast svo á þeim álitamálum sem BHM leggur áherslu á og svörum flokkanna við þeim. Fundirnir eru opnir öllum aðildarfélögum bandalagsins og gefst þar tækifæri til að eiga milliliðalaust samtal við forystufólk flokkanna um aðgerðir sem þau hyggjast grípa til komist þau til valda.

Þau málefni sem helst brenna á háskólamenntuðum eru kaupmáttarrýrnun, launamunur kynjanna sem enn er staðreynd þrátt fyrir ýmsar aðgerðir við brúun bilsins, skortur á menntuðu starfsfólki víða í heilbrigðis- velferðar- og menntakerfum okkar m.a. vegna launakjara og stóraukins álags á starfsfólk innan kerfanna ásamt aðkallandi málefnum Menntasjóðs námsmanna og endurgreiðslubyrði námslána.