Starfsendurhæfing
Einstaklingar sem búa við skerta starfsorku vegna heilsubrests eiga rétt á starfsendurhæfingu með endurkomu á vinnumarkað að markmiði.
Starfsendurhæfing
VIRK Starfsendurhæfing veitir þjónustu og ráðgjöf á sviði starfsendurhæfingar.
Hlutverk VIRK er að efla starfsgetu einstaklinga með heilsubrest sem stefna að aukinni þátttöku á vinnumarkaði. Á þann hátt megi draga markvisst úr líkum á því að launafólk hverfi af vinnumarkaði vegna varanlegrar örorku.
Á heimasíðu VIRK eru birtar greinargóðar leiðbeiningar um ferill við starfsendurhæfingu.
Þjónusta VIRK er til staðar á öllum helstu þéttbýlisstöðum landsins. Lögð er áhersla á að nýta fagfólk á hverju svæði fyrir sig og þróa úrræði sem henta þeim fjölbreytta hópi sem nýtir sér þjónustu VIRK.
VIRK er sjálfseignarstofnun stofnuð árið 2008 af helstu samtökum stéttarfélaga og atvinnurekenda á vinnumarkaði. Starfsemin er fjármögnuð af atvinnurekendum, lífeyrissjóðum og ríkisvaldinu.
Endurhæfingarlífeyrir
Tryggingastofnun greiðir endurhæfingarlífeyrir samhliða starfsendurhæfingu.
Endurhæfingaráætlun þarf að liggja fyrir sem tekur mið af heilsufarsvanda umsækjanda.
Endurhæfingaráætlun skal unnin af heilbrigðismenntuðum fagaðila, svo sem lækni, sjúkraþjálfara, félagsráðgjafa, sálfræðingi, iðjuþjálfara eða hjúkrunarfræðingi í samvinnu við umsækjanda um endurhæfingarlífeyri, eða fagaðila sem er viðurkenndur á sviði atvinnutengdrar starfsendurhæfingar samkvæmt samningum starfsendurhæfingarsjóða.
Tryggingastofnun er heimilt að ákvarða endurhæfingarlífeyri til allt að 36 mánaða þegar ekki verður séð hver starfshæfni einstaklings sem er á aldrinum 18-67 ára verður til frambúðar eftir sjúkdóma eða slys.
Framlengja má greiðslutímabil um allt að 24 mánuði eftir að 36 mánaða markinu er náð ef starfsendurhæfing með það að markmiði að auka atvinnuþátttöku er enn talin raunhæf að mati framkvæmdaraðila og Tryggingastofnunar.
Nánari leiðbeiningar eru veittar á heimasíðu Tryggingastofnunar.