Ég er að ljúka störfum

• Sjúkrasjóður BHM (almennur vinnumarkaður): Sjóðfélagar halda réttindum í 12 mánuði eftir að þeir láta af störfum og fara á lífeyri. Sjúkradagpeningar eru þó ekki greiddir lengur en í þrjá mánuði.
• Styrktarsjóður BHM (opinberi vinnumarkaðurinn): Sjóðfélagar halda réttindum til annarra styrkja en sjúkradagpeninga í 6 mánuði eftir að þeir láta af störfum og fara á örorku- eða ellilífeyri. Réttur til sjúkradagpeninga fellur niður þegar taka örorku- eða ellilífeyris hefst að fullu, þó í síðasta lagi við 70 ára aldur, sé sjóðfélagi ekki í ráðningarsambandi.
• Starfsmenntunarsjóður BHM: Sjóðsaðild telst lokið að þremur mánuðum liðnum eftir að ráðningarsambandi lýkur. Samkomulag aðila í ráðningarsamningi um bætur í tengslum við starfslok, þ.á.m. hvernig þær skulu ákvarðaðar og greiddar, binda ekki hendur sjóðsstjórnar við mat á því hvenær ráðningarsambandi telst lokið.
• Starfsþróunarsetur háskólamanna: Aðild félagsfólks að Starfsþróunarsetrinu lýkur þegar greiðslum iðgjalda er hætt.
• Orlofssjóður BHM: Þeir sjóðfélagar sem njóta fullra réttinda í OBHM við töku lífeyris geta greitt ævigjald til þess að viðhalda sjóðsaðild og fá við greiðslu 72 punkta. Um frekari punktaávinnslu er ekki að ræða. Sjóðfélagi hefur 24 mán til þess að óska eftir ævigjaldi eftir að iðgjaldagreiðslur hætta að berast í orlofssjóðinn.
  ATH! að ekki er hægt að fara í meira en -48 punkta. Við greiðslu á ævigjaldi viðheldur sjóðfélagi sömu réttindum og áður fyrir utan að geta ekki leigt orlofskosti á úthlutunartímabilum (yfir páska eða sumar). Ævigjaldsþegar geta þó bókað þegar það opnar fyrir alla til að bóka eftir úthlutun og forgangsbókun.
  Ævigjaldið tekur breytingum árlega (janúar) og er miðað við launavísitölu og grunnvísitöluna 803,8.

Það er mismunandi hvenær fólk ákveður að hætta að vinna. Það getur farið eftir ýmsu; hvar viðkomandi starfar, hvernig heilsan er, hvort hægt sé að byrja á að minnka við sig og svo framvegis.

Flest hefja töku ellilífeyris við 67 ára aldur en einnig er hægt að flýta því til 65 ára aldurs eða fresta til 70 ára aldurs.

Íslenskt lífeyriskerfi er byggt upp af þremur meginstoðum:

1. Almannatryggingar / Tryggingastofnun ríkisins
2. Lífeyrissjóðir
3. Einstaklingsbundinn lífeyrissparnaður

Í Lífeyrisgáttinni, upplýsingavef um lífeyrismál, er að finna greinargóðar upplýsingar um allt sem viðkemur lífeyristöku. Eins er þar hægt að panta lífeyrisfræðslu fyrir einstaklinga og hópa.

Öll þurfum við að greiða hluta af launum okkar í lífeyrissjóð. Þannig ávinnst trygging fyrir lífeyrisgreiðslum frá því fólk hættir að vinna og út ævina. Greiðslurnar endurspegla þitt framlag í gegnum árin.

Þau sem eru 65 ára og eldri og hafa búið á Íslandi í minnst þrjú ár eiga einhvern rétt á ellilífeyri frá íslenska ríkinu. Jafnframt geta eldri borgarar átt rétt á ýmsum styrkjum og uppbótum.

Í reiknivél TR er hægt að slá inn mismunandi forsendur og sjá niðurstöðu.