Fjar­vinna

Umtalsverð aukning varð á fjarvinnu í kjölfar Covid 19 heimsfaraldursins á árunum 2020-2021 þegar vinnuveitendur voru hvattir til að skipuleggja fjarvinnu starfsfólks þar sem því varð við komið til að stemma stigu við útbreiðslu faraldursins.

Fjarvinna býður upp sveigjanleika fyrir starfsfólk með fjölskylduábyrgð og aðra sem hafa möguleika á því að vinna heiman frá sér. Víða er fjarvinna þegar orðin fastur liður í skipulagi vinnu starfsfólks.

Á vef Vinnueftirlits ríkisins eru birtar ítarlegar upplýsingar um réttindi starfsfólks í fjarvinnu.

Í gildi er samkomulag á vinnumarkaði um fjarvinnu, frá árinu 2006, þar sem meðal annars er að finna skilgreiningu fjarvinnu, fjallað um notkun á hvers kyns búnaði við störf og skil milli vinnu og einkalífs.

Þá er bókun um fjarvinnu í kjarasamningi aðildarfélaga BHM við Samtök atvinnulífsins (SA) frá júní 2021. Á grunni þeirrar bókunar hafa samningsaðilar útbúið fjarvinnusniðmát sem félagsmenn þeirra geta nýtt sér vegna fjarvinnu sem er unnin reglulega eða alfarið á starfsstöð utan hefðbundinnar starfsstöðvar atvinnurekanda.

Snemma árs 2021 kannaði BHM umfang og umgjörð fjarvinnu sem félagsmenn aðildarfélaga bandalagsins inna af hendi og viðhorf þeirra til þessa vinnuforms. Þar kom m.a. fram að 60% félagsmanna BHM telja mikilvægt að bandalagið beiti sér fyrir því að réttur til heimavinnu verði tryggður í næstu kjarasamningum.

Í október 2022 komust aðilar vinnumarkaðarins innan opinbera geirans í Evrópu að samkomulagi um réttarstöðu starfsfólks í fjarvinnu og um réttinn til að aftengjast.

Unnið er að því á samkomulagið verði sett í búning löggjafar á vettvangi Evrópusambandsins og öðlist með þeim hætti víðtækt og almennt gildi í aðildarríkjum sambandsins.