Gjald­þrot

Verktakar utan verndar Ábyrgðasjóðs launa

Sjálfstætt starfandi einstaklingar (verktakar) njóta ekki verndar samkvæmt lögum um Ábyrgðasjóð launa. Ef fyrirtæki sem hefur keypt af þeim vinnu eða þjónustu verður gjaldþrota, njóta kröfur þeirra ekki forgangs við skipti þrotabúsins – hvorki vegna vinnuframlags né annarra krafna.

Ábyrgðasjóður launa er ætlaður til að vernda réttindi launafólks sem hefur átt inni vangoldin laun, orlofs- og uppsagnarfrestsgreiðslur, lífeyrisiðgjöld og önnur réttindi sem byggjast á ráðningarsambandi – ef vinnuveitandi þess verður gjaldþrota.

Verktakar eru aftur á móti ekki í ráðningarsambandi við kaupanda þjónustunnar og falla því utan lagaumhverfis sem tryggir vernd hjá Ábyrgðasjóðnum.

Mikilvægt að greina rétt sambandsform

Það getur þó skipt sköpum að meta hvort samningssamband aðila hafi í reynd verið ráðningarsamband, þrátt fyrir að það hafi verið sett fram sem verktakasamningur. Í slíkum tilvikum getur verið um svokallaða gerviverktöku að ræða, sem þýðir að aðili sem er skráður sem verktaki hafi í raun verið starfsmaður í hefðbundnu vinnusambandi, með tilheyrandi réttindum.

Ráðgjöf aðildarfélaga BHM

Félagsfólk í aðildarfélögum BHM getur leitað sér ráðgjafar ef vafi leikur á stöðu sinni eða ef fyrirtæki sem það hefur unnið fyrir verður gjaldþrota. Ráðgjöf getur skipt sköpum við að meta næstu skref og gæta hagsmuna sinna – sérstaklega ef ágreiningur er um hvort starfssambandið hafi í raun verið verktaka eða ráðningarsamband.